Lúðrasveit Hafnarfjarðar

Lúðrasveit Hafnarfjarðar blæs til hausttónleika í Víðistaðakirkju laugardaginn 22. nóvember kl. 14:00.

Á efnisskránni er mestanpart danstónlist að þessu sinni; bæði tangóar, tjútt, balletttónlist og þjóðdansar. Meðal annars verður leikinn Libertango eftir Astor Piazzolla, spænskur dans eftir Manuel de Falla og syrpa laga úr dans- og söngvamyndinni La la land. Einnig stígur slagverksdeildin fisléttan pússiklossaballett í lagi eftir Íslandsvininn Leroy Anderson.

Stjórnandi Lúðrasveitar Hafnarfjarðar er Rúnar Óskarsson.

Almennt miðaverð er 2500 krónur, en aðgangur er ókeypis fyrir 16 ára og yngri. Miða má nálgast í forsölu hjá lúðrasveitarfélögum fram að tónleikadegi, en einnig verður miðasala við innganginn. Rétt er að benda á að ekki verður posi við innganginn.

Viðburður fyrir tónleikana á Facebook.

Nú er komið að því að endurtaka leikinn! Laugardaginn 18. október næstkomandi heldur Lúðrasveit Hafnarfjarðar sitt árlega Októberfest á Ægi 220 annað árið í röð.

Fluttir verða valdir slagarar úr hinni víðfrægu grænu möppu LH, en hún geymir það allra besta í þýskri bjórtónlist auk íslenskra gullmola í svipuðum stíl. Sérstakur gestur verður stórsöngvarinn Örvar Már Kristinsson sem syngur valda þýska slagara með sveitinni.

Hér er einstakt tækifæri til að heyra tónlistina sem spiluð er á Oktoberfest í München ár hvert ásamt því að skála, eta og drekka saman! Skemmst er frá því að segja að gríðarleg stemning myndaðist í fyrra.

Ægir opnar kl. 17, matarvagn verður á svæðinu frá kl. 18 og Lúðrasveitin byrjar að spila kl. 20.

Aðgangur ókeypis!

Viðburður fyrir októberfestið á Facebook

Lúðrasveit Hafnarfjarðar fagnar 75 ára afmæli í ár og blæs til afmælistónleika í Norðurljósum miðvikudaginn 9. apríl kl. 20:00.

Efnisskráin samanstendur að miklu leyti af verkum sem hafa nýlega verið samin eða útsett fyrir lúðrasveitir, meðal annars eftir Philip Sparke, John Williams og Johan de Meij. Einnig verða leikin ýmis verk sem lúðrasveitin hefur leikið gegnum tíðina, svo sem Blásið hornin eftir Árna Björnsson og konsertpolka Páls Pampichler Pálssonar fyrir tvær klarinettur og lúðrasveit, en þar munu Ásdís Birta Guðnadóttir og Kristín Jóna Bragadóttir spila sólópartana.

Stjórnandi Lúðrasveitar Hafnarfjarðar er Rúnar Óskarsson.

Miðaverð er 2000-3000 krónur. Miðasala fer fram á tix.is.

Facebook-viðburður fyrir tónleikana.