Holland heillar

Æfingar eru nú hafnar af fullum krafti fyrir stóru Hollandsferðina, en lúðrasveitin mun dvelja við leik og störf í Amersfoort í Hollandi dagana 18. til 25. júní.

Áður en að því kemur mun sveitin þó taka þátt í hátíðahöldum sjómannadagsins og 17. júní.

Kröfuganga 1. maí

Lúðrasveitin leikur að vanda í kröfugöngu verkalýðsfélaganna á Verkalýðsdaginn 1. maí. Gangan leggur af stað frá Bæjarbíói kl. 14 en lúðrasveitin leikur nokkur lög meðan göngumenn safnast saman.

Mæting er í Tónkvísl kl. 13, í fullum fjólubláum skrúða, svörtum sokkum og nýpússuðum svörtum spariskóm. Okkar hlutverki verður lokið um kl. 14:30.

Lúðraþytur í Hörpu

Lúðrasveit Hafnarfjarðar heldur tónleika í Norðurljósum, Hörpu þriðjudaginn 18. mars kl. 20:00.

Þetta eru fimmtu og síðustu tónleikarnir í tónleikaröðinni Lúðraþytur í Hörpu, sem lúðrasveitir af suðvesturhorni landsins hafa staðið fyrir í vetur. Lúðrasveitin verður ekki ein á ferð, því hún hefur fengið Flensborgarkórinn til liðs við sig, undir stjórn Hrafnhildar Blomsterberg, og mun kórinn syngja nokkur lög með lúðrasveitinni.

Á efnisskrá tónleikanna verða nýleg lúðrasveitaverk fyrirferðarmikil. Má þar meðal annars nefna verkin Suite Arktica II eftir Pál Pampichler Pálsson og Sleep eftir Eric Whitacre. Einnig verða leiknir hefðbundnir Sousa-marsar.

Stjórnandi Lúðrasveitar Hafnarfjarðar er Rúnar Óskarsson.

Miðaverð er 2000 krónur. Miða á tónleikana má kaupa á vefsíðunni miði.is og á heimasíðu Hörpu.

Gleðileg jól!

Lúðrasveit Hafnarfjarðar óskar lúðurþeyturum og landsmönnum öllum gleðilegra jóla.

Fyrsta æfing á nýju ári verður mánudagskvöldið 6. janúar kl. 20.

Aðventutónleikar lúðrasveitarinnar

Lúðrasveitar Hafnarfjarðar heldur aðventutónleika í Víðistaðakirkju laugardaginn 30. nóvember kl. 14:00.

Á efnisskránni er meðal annars að finna svítu fyrir lúðrasveit eftir Gustav Holst, tvo kafla úr svítu fyrir sviðshljómsveit eftir Dmítríj Sjostakóvítsj og íslenskan jólaforleik eftir Sigurð I. Snorrason – auk hefðbundinna marsa.

Einleikarar á tónleikunum verða trompetleikarinn Andrés Björnsson sem leikur tangó eftir Astor Piazzola og hornleikarinn Erna Ómarsdóttir sem leikur rondókafla úr einum hornkonserta Mozarts. Auk þess stígur básúnudeildin á svið og leikur Lustige Polka eftir Hans Hartwig.

Stjórnandi Lúðrasveitar Hafnarfjarðar er Rúnar Óskarsson.

LH á aðventutónleikum 1. desember 2012

Tendrun ljósa á jólatrjám

Lúðrasveit Hafnarfjarðar leikur við tendrun ljósa á tveimur jólatrjám laugardaginn 30. nóvember. Hið fyrra er Frederiksbergstréð á Thorsplani í Hafnarfirði klukkan 16:30 og svo Hamborgartréð við Reykjavíkurhöfn kl. 17:00.

Sama dag kl. 14 verða aðventutónleikar lúðrasveitarinnar haldnir í Víðistaðakirkju.