Lúðrasveit Hafnarfjarðar

Hæ, hó, jibbí-jey!

Það er kominn sautjándi júní!

Þjóðhátíðardagurinn er einn af föstum punktum Lúðrasveitarinnar ár hvert og í ár verður ekki gerð nein undantekning.

Klukkan 12:45 verður safnast saman fyrir utan Flensborgarskólann. Skrúðganga leggur svo af stað frá skólanum klukkan 13:00. Gengið verður niður Hringbraut, eftir Lækjargötu og inn Strandgötu að Thorsplani.

Að göngu lokinni, eða um kl. 14:00, heldur Lúðrasveitin svo tónleika fyrir utan Hafnarborg.

Áhugasamir geta kynnt sér dagskrá þjóðhátíðarhalda í Hafnarfirði á vef bæjarins.

Pollalúðrapönk

Pollalúðrapönk. Lúðrasveit Hafnarfjarðar, Pollapönk og Kór Öldutúnsskóla

Þrjár hafnfirskar menningarstofnanir; Pollapönk, Lúðrasveit Hafnarfjarðar og Kór Öldutúnsskóla leiða saman hesta sína á stórtónleikum í Íþróttahúsinu við Strandgötu laugardaginn 16. febrúar 2019 kl. 14:00. Sambræðingur þessara ólíku hópa verður án efa gríðarlega spennandi en á efnisskránni verður úrval laga Pollapönkaranna í splúnkunýjum útsetningum.

Pollapönk þarf varla að kynna. Þeir eru Hafnfirðingar í húð og hár og voru brautryðjendur í að semja og leika íslenska rokktónlist fyrir sem var sérsniðin fyrir börn. Þeirra frægasta lag er án efa Enga fordóma sem þeir fluttu fyrir hönd Íslands í Eurovision 2014.

Lúðrasveit Hafnarfjarðar var stofnuð í janúar 1950 og er því komin fast að sjötugu. Sveitina skipa um 40 blásarar og slagverksmenn. Stjórnandi Lúðrasveitar Hafnarfjarðar er Rúnar Óskarsson.

Á þeim rúmlega fimmtíu árum sem Kór Öldutúnsskóla hefur starfað, hafa þúsundir hafnfirskra barna tekið þátt í kórstarfinu og notið leiðsagnar í söng og tónlistarflutningi. Kórinn skipa nú um 100 börn. Stjórnandi Kórs Öldutúnsskóla er Brynhildur Auðbjargardóttir.

Fullt miðaverð er 2500 kr. Börn á aldrinum 7-16 ára greiða 1500 kr., en ókeypis er fyrir börn yngri en 7 ára í fylgd með fullorðnum.
Athugið að allir tónleikagestir þurfa að framvísa miðum, líka ung börn.

Miðasala fer fram á Miði.is.

Viðburðurinn á Facebook.

Verkefnin framundan

Nú standa yfir æfingar og undirbúningur fyrir næstu tónleika lúðrasveitarinnar.

Þeir verða haldnir 16. febrúar og hefur lúðrasveitin fengið til liðs við sig Kór Öldutúnsskóla og Pollapönk til að vera með á tónleikunum.

Nánari upplýsingar verða birtar í fyllingu tímans. Fylgjast má með framvindu mála hér á vefnum og á Facebook-síðu lúðrasveitarinnar

Hausttónleikar lúðrasveitarinnar

Hausttónleikar Lúðrasveitar Hafnarfjarðar verða haldnir í Víðistaðakirkju fyrsta vetrardag, laugardaginn 27. október kl. 14:00.

Á efnisskránni eru verk Leonards Bernstein áberandi, en um þessar mundir eru 100 ár liðin frá fæðingu hans. Básúnu- og klarinettudeildirnar munu fá að sýna hvað í þeim býr í Sweet trombone rag eftir Al Sweet og Pie in the face polka eftir Henri Mancini. Einnig verður flutt Svíta fyrir lúðrasveit eftir Gustav Holst, vel valdir marsar og fleira.

Stjórnandi Lúðrasveitar Hafnarfjarðar er Rúnar Óskarsson.

Almennt miðaverð á tónleikana er 1500 krónur. Miða má nálgast í forsölu hjá lúðrasveitarfélögum og við innganginn fyrir tónleikana.

Lúðrasveit Hafnarfjarðar í Augustiner-bjórgarðinum
Þessi föngulegi hópur verður á tónleikum 27. október kl. 14:00.

Vortónleikar lúðrasveitarinnar

Vortónleikar Lúðrasveitar Hafnarfjarðar verða haldnir í Víðistaðakirkju á þriðja degi sumars; laugardaginn 21. apríl kl. 14:00.

Á efnisskránni eru mestanpart verk samin fyrir lúðrasveit, sum gömul en önnur glæný. Meðal annars verður þar að finna marsa eftir John Philip Sousa og Johannes Hansen, og nýleg verk eftir Robert Buckley, Dana Wilson og James Curnow.

Á tónleikunum munu tveir félagar úr lúðrasveitinni leika einleik; Helena Guðjónsdóttir á þverflautu og Kristinn Svavarsson á altsaxófón.

Stjórnandi Lúðrasveitar Hafnarfjarðar er Rúnar Óskarsson.

Miðaverð er 1500 krónur. Miða má kaupa í forsölu hjá lúðrasveitarfélögum fram að tónleikadegi eða við innganginn.

Lúðrasveit Hafnarfjarðar í Augustiner-bjórgarðinum
Lúðrasveit Hafnarfjarðar að loknum tónleikum í Augustiner bjórgarðinum.

Hausttónleikar LH, Flensborgarkórsins og Kórs Flensborgarskólans

Lúðrasveit Hafnarfjarðar, Flensborgarkórinn og Kór Flensborgarskólans halda sameiginlega hausttónleika laugardaginn 25. nóvember kl. 14:00. Tónleikarnir verða haldnir í nýju húsnæði Björgunarsveitar Hafnarfjarðar, Hvaleyrarbraut 32, gengið inn frá Lónsbraut. (Hér má sjá staðinn á korti).

Tónlist úr kvikmyndum, sjónvarpsþáttum og tölvuleikjum verður fyrirferðarmikil á efnisskránni, meðal annars úr Söngvaseiði, Amistad, Stjörnustríði og Harry Potter – ýmist flutt af lúðrasveitinni, kórunum eða öllum saman.

Stjórnendur á tónleikunum eru Hrafnhildur Blomsterberg og Rúnar Óskarsson.

Almennt miðaverð er 2000 kr. en 1000 kr. fyrir börn 12 ára og yngri. Vegna takmarkaðs sætaframboðs er best að nálgast miða í forsölu hjá félögum kóranna eða lúðrasveitarinnar.

Lúðrasveit Hafnarfjarðar, Flensborgarkórinn og Kór Flensborgarskólans
Lúðrasveit Hafnarfjarðar, Flensborgarkórinn og Kór Flensborgarskólans