Sumarfríið er senn á enda og komið að því að blása rykið af lúðrunum.
Fyrsta æfing starfsársins 2017-2018 verður haldin í Tónkvísl mánudaginn 28. ágúst klukkan 20:00.
Nýir og gamlir félagar eru velkomnir.
admin
Sumarfrí
Í gær, mánudaginn 26. júní, lauk vel heppnaðri, vikulangri tónleika- og skemmtiferð um München, Salzburg og nágrenni, þar sem lúðrasveitin heillaði Bæjara og nærsveitunga með undurfögrum lúðrablæstri.
Þar með er sveitin komin í sumarfrí. Æfingar hefjast aftur í lok ágúst.
Gleðilegt sumar og takk fyrir veturinn!
In München steht ein Hofbräuhaus
Skyldustörfum þjóðhátíðardagsins er nú lokið hjá lúðrasveitinni.
Sveitin er þó ekki farin í sumarfrí, því mánudaginn 19. júní verður haldið í tónleika- og skemmtiferð til Münchenar, þar sem dvalið verður í eina viku.
Haldnir verða fernir tónleikar í borginni og nágrenni hennar og einir í Salzburg í Austurríki. Tónleikadagskráin er eftirfarandi:
- Miðvikudagur 21. júní kl. 16:00: Mirabell garðurinn í Salzburg.
- Föstudagur 23. júní kl. 16:00: Bjórgarðurinn í Andechs klaustrinu.
- Laugardagur 24. júní kl. 12:00: Café Blá, Lilienstraße 34
- Laugardagur 24. júní kl. 16:00: Waldwirtschaft bjórgarðurinn.
- Sunnudagur 25. júní kl. 17:00: Augustiner bjórgarðurinn.
Sautjándi júní
Hæ, hó, jibbý, jei, kæru Hafnfirðingar, og aðrir landsmenn!
Í dag er sautjándi júní haldinn hátíðlegur um land allt.
Að vanda fer lúðrasveitin fyrir skrúðgöngunni í Hafnarfirði í dag. Hún leggur af stað klukkan 13:00 frá skátaheimilinu Hraunbyrgi við Hjallabraut.
Að göngu lokinni verða svo spiluð nokkur létt lög fyrir utan Hafnarborg, eða um klukkan 14:00.
Á vef Hafnarfjarðarbæjar má skoða dagskrá dagsins.
Sjómannadagurinn
Sjómannadagurinn er í dag og samkvæmt venju tekur lúðrasveitin þátt í hátíðahöldum í Hafnarfirði í tilefni dagsins.
Klukkan 10:00 verður spilað fyrir utan Hrafnistu í Hafnarfirði.
Eftir hádegi verða svo hátíðahöld við Flensborgarhöfn og hefur lúðrasveitin leik klukkan 13:50.
Áhugasamir geta kynnt sér dagskrána nánar á vef Hafnarfjarðarbæjar.
Vortónleikar 2017
Vortónleikar Lúðrasveitar Hafnarfjarðar verða haldnir í Hafnarborg laugardaginn 1. apríl kl. 17:00.
Bróðurpartur verkanna á efnisskránni var saminn fyrir leiksvið eða hvíta tjaldið; þar er um að ræða kvikmyndatónlist eftir John Williams og Danny Elfman, tónlist Claude-Michels Schoenberg úr Vesalingunum, og kafla úr svítu fyrir sviðshljómsveit eftir Dmítríj Sjostakóvítsj. Að auki verða flutt lög eftir Astor Piazzolla, Chick Corea og fleiri.
Stjórnandi Lúðrasveitar Hafnarfjarðar er Rúnar Óskarsson.
Miðaverð er 1500 krónur, en aðgangur er ókeypis fyrir 16 ára og yngri. Miða má nálgast í forsölu hjá lúðrasveitarfélögum fram að tónleikadegi og við innganginn þegar þar að kemur.